బీడైన భువి మోడైన మాను
చినుకు సవ్వడికై తండ్లాట
ఋతుపవనాల రాక
మేఘసందేశంతో చినుకు లయ షురూ
చకోరపక్షుల రావాలు తొలకరికి ఆనవాలు
తొలి చినుకులే వాటి దాహార్తిని తీర్చు
జంతు పశుపక్ష్యాదులకు
ధరలో ఆహ్లాదం
బీడూ మోడుల పులకింత
తడిచిన నేల చెమ్మ నిలుపుకొని
మొలక చిగురింత
ప్రకృతి పలు వర్ణాలతో
రాగరంజిత మగు
జనావాసాలు తొలకరి
సవ్వడిలో సేదతీరు
తడిచిన మట్టి పరిమళం వెదజల్లు
తరువులు పుష్ప పత్ర
సౌరభాలతో మురియు
పండ్లు కాయగూరలకు
అనువైన సేద్య కాలం
ఎప్పుడెప్పుడా ! అని
ఎదురు చూచే రైతు
ఆశలు నెరవేరు కాలం
పండుగ పబ్బాలతో సంతోషకరం
ప్రకృతిమాత కు పూజలందించ
పడుచు పిల్లలు వనితలు
పట్టు పావడాలు చీరలతో
అందం ఆనందం ఇనుమడించు కాలం
ఉరుములు మెరుపుల ఘీంకారాలకు
బెదరక మేఘాలు విడుచు
నీటి పూలబాణాలకు ఎదురొడ్డి
నిలిచి తడిచి ముద్దయి
ఆడుకోవాలని చిన్నారుల
ఆకాంక్ష తీరు కాలం
అంతా శాంతంగా సవ్యంగా
జరిగినంత వరకు అన్నీ
శుభ సూచికములే !
సంధ్య సుత్రావె, ఫోన్ 9177615967, హైదరాబాద్.
