అలుపెరుగని అల

ఆడది ఆదిశక్తి అంటారు

కానీ ఆదిలోనే తుంచేస్తుంటారు

మా ఇంటి మహాలక్ష్మి అంటారు

కానీ మైనస్ గానే లెక్కిస్తారు

స్త్రీలను గౌరవించే సంస్కృతి అంటారు

కానీ సదా కించపరుస్తూనే ఉంటారు

సుద్దులన్నీ అమ్మాయికి

హద్దులే ఉండవు అబ్బాయికి

మాటల్లోనే స్త్రీ, పురుష సమానత్వం

చేతల్లో ఇంటా బయటా అసమానత్వం

పార్లమెంటులో ముప్ఫై మూడు శాతం

ఇప్పటికీ సాకారం కాని స్వప్నం

పదవులొచ్చినా అవి నామమాత్రమే

పెత్తనం పురుషుల సొంతమే

పేరుకే మనది ప్రజస్వామ్యం

వాస్తవంలో అది పురుషస్వామ్యం

మహిళా దినోత్సవం ఏటా వస్తుంది

కానీ మార్పే రావడంలేదు ఏనాటికీ

ఏమున్నది గర్వకారణం?

ఈరోజునా అత్యాచారాలు..హత్యాచారాలు

షరా మామూలే

వేదికలపై పొగడ్తలకు పొంగిపోతాం

అల్పసంతోషులం కదా

అయినా అడుగు ముందుకేయాలంటే

ఆశే కదా మనిషికి అసలైన శ్వాస

ఆత్మబలమే కదా కొండంత అండ

గుప్పెడు విజయ గాథల స్ఫూర్తిని

గుండెనిండా నింపుకుని

సాధికారత సాధనకు

అనవరతం ప్రయత్నించే నువ్వు

అలుపెరుగని అలవు!

జె.శ్యామల