తల్లి జన్మనిస్తే తండ్రి నడక నేర్పిస్తాడని, కానీ జీవితాన్ని నేర్పేది మాత్రం గురువేనని శాసన సభాపతి పోచారం శ్రీనివాస్ రెడ్డి అన్నారు. ఉపాధ్యాయ దినోత్సవాన్ని పురస్కరించుకుని జిల్లా కేంద్రంలోని కళాభారతి ఆడిటోరియంలో ఉత్తమ ఉపాధ్యాయులకు సన్మాన కార్యక్రమం నిర్వహించారు. ఈ సందర్బంగా పోచారం మాట్లాడుతూ.. గురువు లేని విద్య గుడ్డి విద్య అన్నారు. ఉత్తమ సమాజాన్ని తయారు చేసేది గురువు మాత్రమేనని తెలిపారు. చంద్రయాన్ 3 విజయంతో ప్రపంచంలోనే అగ్రగామిగా నిలిచామని దానికి పునాది ఉపాధ్యాయుడేనని తెలిపారు. రాష్ట్రంలో 26 వేల పాఠశాలలు ఉన్నాయని, ఇందులో 37 లక్షల మంది విద్యార్థులు ఉన్నారని, వారిని మంచి పౌరులుగా తీర్చిదిద్దేది గురువేనని తెలిపారు. ఉపాధ్యాయుల ప్రోత్సాహంతోనే తాను ఈ స్థాయిలో ఉన్నానని పేర్కొన్నారు. అనంతరం ఉత్తమ ఉపాధ్యాయులను సన్మానించారు. ఈ కార్యక్రమంలో జిల్లా కలెక్టర్ జితేష్ వి పాటిల్, జుక్కల్ ఎమ్మెల్యే హన్మంత్ షిండే, జిల్లా విద్యాశాఖ అధికారి రాజు, ఉపాధ్యాయులు పాల్గొన్నారు.
జీవితాన్ని నేర్పేది గురువు: స్పీకర్ పోచారం శ్రీనివాస్ రెడ్డి
