జాతీయ బీసీ కమిషన్ కు తీన్మార్ మల్లన్న ఫిర్యాదు

తెలంగాణ రాష్ట్రంలో జర్నలిజాన్ని అంతమొందించాలని చూస్తున్నారని, ప్రభుత్వ విధానాలను ఎండగట్టిన జర్నలిస్టులను ఎక్కడికక్కడ కేసులతో వేధిస్తున్నారని జాతీయ బీసీ కమిషన్ కు తీన్మార్ మల్లన్న ( క్యూ న్యూస్) ఫిర్యాదు పంపారు.

ఈ ఫిర్యాదును నాజా  జాతీయ అధ్యక్షుడు మురహరి బుద్ధారం బీసీ కమిషన్ కు అందజేశారు. వాస్తవిక కథనాలను పబ్లిష్ చేస్తుంటే పోలీసుల వేధింపులు ఎక్కువయ్యాయని ఫిర్యాదులో తెలిపారు. రాష్ట్ర వ్యాప్తంగా అనేక మంది జర్నలిస్టులు ఇటువంటి ఇబ్బందులు ఎదుర్కొంటున్నారని ఫిర్యాదులో తెలియజేశారు.

ఓ దొంగ స్వామి లీలలపై క్యూ న్యూస్ లో బాధితుల తరపున కథనాలు  రిలీజ్ చేస్తే బ్లాక్ మెయిల్ చేస్తున్నారని నిందలు వేస్తూ విచారణ పేరుతో పేరిట గంటల తరబడి పోలీస్ స్టేషన్లో కూర్చోబెట్టుకొని కాలయాపన చేస్తున్నారని పేర్కొన్నారు. చిన్న కేసుల విషయంలో కూడా పదే పదే పోలీస్ స్టేషన్లో హాజరు కావాలని నోటీసులు సర్వ్ చేస్తున్నారని ఫిర్యాదులో పేర్కొన్నారు.

తప్పు చేసిన వారిని వెనకేసుకు వస్తూ  వాస్తవ కథనాలను రిలీజ్ చేసిన వారిపై కేసులు పెట్టడం ఎంతవరకు సమంజసం అంటూ ఫిర్యాదులో పేర్కొన్నారు.

అంతేకాకుండా ఎలాంటి నోటీసులు ఇవ్వకుండా రాత్రి వేళలో  పోలీసులు వాహనాల లో వచ్చి క్యూ న్యూస్ ఆఫీసు కు వచ్చి సోదాలు చేశారని, కొందరి నాయకుల అవినీతి అక్రమాలకు ఆధారాలు లేకుండా  డేటా, హర్డు డిస్కు లు తీసుకెళ్లారని ఫిర్యాదులో పేర్కొన్నారు.

ఈ విషయంపై డిజిపి, కమిషనర్ ఆఫ్ పోలీస్  లకు ఫిర్యాదు చేసినా పట్టించుకోవడంలేదని, చిలకలగూడ పోలీసులపై అత్యుత్సాహం పై  చర్యలు తీసుకోవాలని జర్నలిజాన్ని రక్షించాలని ఫిర్యాదు చేశారు.

జాతీయ బీసీ కమిషన్ సభ్యులు ఆచారి ఫిర్యాదును స్వీకరించారు. 15రోజుల్లో నివేదికను అందించాలని కమిషనర్ ఆఫ్ పోలీస్ హైదరాబాద్ ను ఆదేశిస్తూ నోటీసులు జారీ చేశారు.