ఢిల్లీలో 2012లో జరిగిన అత్యాచారం మరియు హత్య కేసులో ముగ్గుర్ని సుప్రీంకోర్టు నిర్దోషులుగా విడుదల చేయడంపై రివ్యూ పిటీషన్ దాఖలు చేసేందుకు ఢిల్లీ లెఫ్టినెంట్ గవర్నర్ ఆమోదం తెలిపారు. చావ్లా గ్యాంగ్ రేప్ పేరుతో ప్రముఖమైన ఈ కేసులో ముగ్గురు దోషులను నిర్దోషులుగా ప్రకటించారు. చావ్లా గ్యాంగ్‌రేప్-హత్య నిందితులను విడుదల చేయాలని నవంబర్ తొలి వారంలో సుప్రీంకోర్టు ఆదేశించింది. ఘటన జరిగిన మూడు రోజుల తర్వాత ఛిద్రమైన బాధితురాలి మృతదేహాన్ని స్వాధీనం చేసుకున్నందున ప్రాసిక్యూషన్ తగిన సాక్ష్యాలను సమర్పించలేకపోయిందని కోర్టు పేర్కొంది.
శరీరంపై లోతైన గాయాలు కనిపించాయి. 2012 ఫిబ్రవరి 14 న చావ్లా ప్రాంతంలో నివసిస్తున్న 19 ఏళ్ల యువతిని ముగ్గురు యువకులు కారులో అపహరించి, సామూహిక అత్యాచారం చేసి, కళ్లలో యాసిడ్ పోసి హత్య చేశారు. ఆ రోజు ఆ యవతి పని ముగించుకుని సాయంత్రం ఇంటికి వెళ్తోంది. ఇంతలో మార్గమధ్యంలో కారులో నుంచి ముగ్గురు యువకులు అపహరించారు. ఎంతసేపటికి కూతురు ఇంటికి రాకపోవడంతో కుటుంబ సభ్యులు ఆందోళన చెంది వెతకడం మొదలుపెట్టారు. అనంతరం బంధువులు ఘటనపై పోలీసులకు సమాచారం అందించారు. పోలీసులు కిడ్నాప్ కేసు నమోదు చేసి దర్యాప్తు ప్రారంభించారు. తొలుత ముగ్గురు యువకులు బాధితురాలిని కారులో నుంచి అపహరించినట్లు పోలీసులకు తెలిసింది. కొద్ది రోజుల తర్వాత ఈ కేసులో ముగ్గురు నిందితులు రవికుమార్, రాహుల్, వినోద్‌ లుగా గుర్తించి పోలీసులు అరెస్ట్ చేశారు. బాలికను అపహరించిన నిందితులు సామూహిక అత్యాచారానికి పాల్పడ్డారని విచారణలో తేలింది. ఈ క్రమంలో కారులో ఉపయోగించే పనిముట్లతో ఆమెను కొట్టారు. ఆమె శరీరాన్ని సిగరెట్‌తో కాల్చారు.
ఆ తర్వాత రెండు కళ్లలో యాసిడ్ పోసి హత్య చేశారు. ఈ కేసులో కింది కోర్టు, ఢిల్లీ హైకోర్టు ముగ్గురు నిందితులకు మరణశిక్ష విధించాయి. ఆ తర్వాత దోషుల తరఫున శిక్షపై సుప్రీంకోర్టులో అప్పీలు దాఖలైంది. హైకోర్టు నిర్ణయాన్ని రద్దు చేస్తూ ముగ్గురు దోషులను సుప్రీంకోర్టు నిర్దోషులుగా ప్రకటించింది. ట్రయల్ కోర్టు తీర్పుపై వ్యాఖ్యానిస్తూ, న్యాయస్థానాలు కేవలం అనుమానం ఆధారంగా నిందితులను దోషులుగా నిర్ధారించలేవని పేర్కొంది. క్రూరమైన నేరానికి పాల్పడిన నిందితులు శిక్షించబడకపోతే లేదా నిర్దోషులుగా విడుదల చేయబడితే, సాధారణంగా సమాజం మరియు బాధితుడి కుటుంబం దుఃఖాన్ని మరియు నిరాశను ఎదుర్కొంటాయని సుప్రీంకోర్టు పేర్కొన్నది.
అయితే ఎలాంటి బాహ్య నైతిక ఒత్తిళ్లకు లోనుకాకుండా, ప్రతి కేసును న్యాయస్థానాల్లో ఖచ్చితంగా మెరిట్‌పై మరియు చట్టానికి అనుగుణంగా నిర్ణయించాలని సుప్రీంకోర్టు పేర్కొంది. ఆరోపణలను సహేతుకమైన సందేహాలకు అతీతంగా నిరూపించడంలో ప్రాసిక్యూషన్ విఫలమైందని సుప్రీంకోర్టు తన ఉత్తర్వుల్లో పేర్కొంది. సుప్రీంకోర్టు ఇచ్చిన తీర్పుపై ఢిల్లీ ప్రభుత్వం రివ్యూ పిటిషన్ దాఖలు చేయనుంది. ఈ కేసుకు ప్రాతినిధ్యం వహించేందుకు ఎస్జీ తుషార్ మెహతా, అదనపు ఎస్జీ ఐశ్వర్య భాటిల నియామకానికి లెఫ్టినెంట్ గవర్నర్ ఆమోదం తెలిపినట్లు సమాచారం.
