తనను ప్రేమించేందుకు నిరాకరించిందనే కోపంతో ఒక శాడిస్టు ప్రేమికుడు ఆ అమ్మాయిని హత్య చేసి మృతదేహం తీసుకుని పరారయ్యాడు. ఉత్తర్ ప్రదేశ్ లోని నోయిడాలో ఈ క్రూరమైన ఘటన జరిగింది. హోషియార్‌పూర్ గ్రామానికి చెందిన 22 ఏళ్ల యువతి శీతల్ అక్కడి శర్మ మార్కెట్‌లోని ఒక బీమా కంపెనీలో పనిచేసేది. ఆమెను గౌరవ్ అనే యువకుడు వెంటపడి వేధించేవాడు.
నిందితుడిపై సెప్టెంబర్ 29న సెక్టార్-49 పోలీస్ స్టేషన్‌లో ఆ యువతి కేసు కూడా పెట్టింది. దీని ఆధారంగానే పోలీసులు గౌరవ్‌ను జైలుకు పంపారు. జైలు నుంచి వచ్చిన తర్వాత అతడిలో మరింత కసి పెరిగింది. మళ్లీ ఆ అమ్మాయి వద్దకు వెళ్లి తాను పెళ్లి చేసుకుంటానని చెప్పాడు. అంతే కాదు తామిద్దరం 2 సంవత్సరాల క్రితం ఒకే ఇన్సూరెన్స్ కంపెనీ ఆఫీసులో పనిచేసేవాళ్లమని గౌరవ్ చెప్పాడు.
అక్కడ వరుసగా ఐదేళ్లు కలిసి పనిచేశాం. ఇద్దరూ కలిసి లివ్‌ఇన్‌లో ఉండేవారం అని కూడా చెప్పాడు. గతంలో ఏదో విషయమై ఇద్దరి మధ్య గొడవలు జరుగుతుండగా.. ఆ యువతి నిందితుడితో నెలల తరబడి మాట్లాడేందుకు ఇష్టపడకపోవడంతో ఆ యువకుడు ఈ ఘటనకు పాల్పడ్డాడు. 22 ఏళ్ల ఆ యువతిని మూడో అంతస్తు నుంచి తోసి మృతదేహంతో యువకుడు పరారయ్యాడు.
మృతదేహంతో పాటు ఘజియాబాద్ మీరట్ ఎక్స్‌ప్రెస్‌వే వద్ద నిందితుడిని అరెస్టు చేశారు. నిందితుడు ఆ మృతదేహాన్ని బిజ్నోర్‌లో కాల్చివేయాలని ప్లాన్ చేశాడు. పోలీసులు వెంటనే చర్యలు చేపట్టి నిందితుడిని పట్టుకున్నారని ఏడీసీపీ అశుతోష్ ద్వివేది తెలిపారు. ఈ మేరకు కుటుంబసభ్యుల ఫిర్యాదు మేరకు కేసు నమోదు చేసి దర్యాప్తు చేస్తున్నారు. నిందితులపై 302, 201, ఎస్సీ ఎస్టీ చట్టం కింద కేసు నమోదు చేశారు.
