లద్దాక్ లో చైనాతో జరిగిన ముష్టియుద్ధంలో భారతీయ సైనికులు 20 మంది చనిపోయిన విషయం తెలిసిందే. మరి చైనా రెడ్ ఆర్మీకి చెందిన వారు ఎంత మంది చనిపోయారు? ఈ విషయం అత్యంత రహస్యంగా ఉంది. చైనా వైపు కూడా సైనికులు చనిపోయారని అంటున్నా ఎంత మంది చనిపోయారో ఇదమిద్ధంగా తెలియలేదు.
ఇదే విషయంపై అమెరికా తన గూఢచారుల ద్వారా రహస్య నివేదికలు తెప్పించుకున్నది. అమెరికా గూఢచారులు ఇచ్చిన నివేదిక ప్రకారం చైనా కు చెందిన దాదాపు 35 మంది సైనికులు చనిపోయారు. అయితే ఈ విషయాన్ని చైనా కూడా రహస్యంగా ఉంచింది.
ఇండియా లాంటి దేశం చేతిలో తమ సైనికులు భారీ ఎత్తున చనిపోయినట్లు ప్రపంచానికి తెలిసే పరువు పోతుందని మృతుల సంఖ్యను చైనా దాచిపెట్టింది. ఇండియా వద్ద సమాచారం ఉన్నా కూడా బహిరంగంగా చెప్పలేదు. మొత్తాన్ని లద్దాక్ లో జరిగిన గొడవలో చైనాకు భారీ నష్టమే వాటిల్లినట్లు ఎట్టకేలకు బయటకు వచ్చింది.
ఈ నేపథ్యంలో చైనా కొద్ది కాలం తర్వాత అయినా ప్రతిఘటిస్తుందని అమెరికా అంచనా వేస్తున్నది. ఈ ప్రతిఘటన ను ఎదుర్కొనాలంటే తమ వద్ద ఉన్న మరిన్ని ఆయుధాలను కొనుగోలు చేయాలని అమెరికా ప్రతిపాదించింది.
దాదాపు వెయ్యి పౌండ్ల బరువుగల బాంబులు, మిస్సైల్స్ ను మోసుకొని వెళ్లగల అధునాతన డ్రోన్ లు తమ వద్ద ఉన్నయని, వాటిని సరసమైన ధరకు ఇస్తామని అమెరికా భారత్ తో బేరం పెట్టినట్లు అమెరికాకు చెందిన ఒక ఫారిన్ పాలసీ మ్యాగజైన్ ప్రచురించింది.
