భారత అంతరిక్ష పరిశోధన సంస్థ(ఇస్రో) ప్రతిష్ఠాత్మకంగా చేపట్టిన గగన్యాన్ యాత్ర 2022 చివరినాటికి లేదా 2023 ప్రారంభంలో.. జరుగుతుందని కేంద్ర మంత్రి జితేంద్ర సింగ్ తెలిపారు. ఇదివరకే గగన్యాన్ యాత్రను ప్రారంభించాల్సింది. 75వ స్వాతంత్య్ర దినోత్సవంతో పాటు జరగాల్సింది. కానీ కొవిడ్-19 కారణంగా వాయిదా పడింది. వచ్చే ఏడాది చివరినాటికి లేదా 2023 ప్రారంభంలో ఈ యాత్ర ప్రారంభం కావచ్చని మంత్రి తెలిపారు. అంతరిక్ష సాంకేతికతలో మరిన్ని అంకుర సంస్థలు రావాలని కేంద్రమంత్రి ఆకాంక్షించారు. స్పేస్ టెక్నాలజీలో ఓషియన్ దేశాల భాగస్వామ్యంతో ముందుకెళ్తామన్నారు. విపత్తు నిర్వహణలో అంతరిక్ష సాంకేతికత చాలా ఉపయోగకరంగా ఉందని జితేంద్ర సింగ్ కొనియాడారు. ఇస్రో మిషన్ గగన్ యాన్ విజయానికి అవసరమైన ఒక ముఖ్యమైన అడుగు విజయవంతంగా వేసింది. ద్రవ చోదక అభివృద్ధి ఇంజిన్ మూడో దీర్ఘకాలిక విజయవంతమైన వేడి పరీక్షను ఇస్రో నిర్వహించింది. మిషన్ కోసం ఇంజిన్ అర్హత అవసరం ప్రకారం జిఎస్ఎల్వి ఎమ్కె 3 వాహనానికి చెందిన ఎల్ 110 ద్రవ స్థాయికి ఈ పరీక్ష జరిగిందని ఇస్రో తెలిపింది.
భారత్ నేతృత్వంలో ఇస్రో మిషన్..
తమిళనాడులోని మహేంద్రగిరిలోని ఇస్రో ప్రొపల్షన్ కాంప్లెక్స్ లోని టెస్ట్ సెంటర్లో ఈ ఇంజన్ 240 సెకన్ల పాటు ప్రయోగించారు. ఇంజిన్ పరీక్ష ప్రయోజనానికి ఉపయోగపడింది. ప్రామాణిక స్పెసిఫికేషన్లకు అనుగుణంగా పనిచేసింది. గగన్ యాన్ అనేది మనుషులను అంతరిక్షానికి పంపడం కోసం భారతదేశం నిర్వహిస్తున్న మొదటి మిషన్. దీని ద్వారా తక్కువ భూమి కక్ష్యలోకి మానవులను పంపించి, భారతీయ ప్రయోగ వాహనం నుండి తిరిగి తీసుకువచ్చే సామర్థ్యాన్ని చూపించడం దీని ఉద్దేశ్యం.‘గగన్ యాన్’మిషన్‌ను ప్రధాని నరేంద్ర మోడీ ఎర్ర కోట నుండి 15 ఆగస్టు 2018 న ప్రకటించారు. ఈ మిషన్ కోసం సుమారు రూ.10 వేల కోట్లు ఖర్చు చేయనున్నారు. ఇందుకోసం 2018 లోనే కేంద్ర కేబినెట్ ఆమోదం తెలిపింది. రష్యా అంతరిక్ష సంస్థ గ్లావ్‌కోస్మోస్‌తో ఈ మిషన్ కోసం ఇస్రో ఒప్పందం కుదుర్చుకుంది. దీని ప్రకారం ఒక గ్రూప్ కెప్టెన్, ముగ్గురు వింగ్ కమాండర్లతో సహా నలుగురు భారత వైమానిక దళ అధికారులు ఈ మిషన్ కోసం ఎంపికయ్యారు. వీరు రష్యాలోని జ్వోజ్డ్నీ గోరోడోక్ నగరంలో శిక్షణను పూర్తి చేశారు. అలాగే ఇద్దరు ఫ్లైట్ సర్జన్లు రష్యా, ఫ్రాన్స్‌లో శిక్షణ తీసుకుంటున్నారు.
అభినందించిన ఎలన్ మస్క్..
రష్యాలో శిక్షణ పొందిన తరువాత, ఈ నలుగురు గగానాట్లకు బెంగళూరులోని ‘గగన్ యాన్’మాడ్యూల్ కోసం శిక్షణ ఇస్తామని ఇస్రో శాస్త్రవేత్తలు చెప్పారు. ఈ మాడ్యూల్ ఇస్రో తయారు చేసింది. ఇందులో ఇతర దేశాల సహాయం తీసుకోలేదు. డిసెంబర్ 2021 నాటికి గగన్ యాన్ మిషన్‌ను లాంచ్ చేస్తామని ఇస్రో ఇంతకు ముందే చెప్పింది. అయితే ఇంతకు ముందు మానవరహిత మిషన్ కోసం డిసెంబర్ 2020 – జూలై 2021 సమయం నిర్ణయించారు. ఈ ఏడాది ఫిబ్రవరిలో మొదటి మానవరహిత మిషన్ డిసెంబర్ 2021 లో పూర్తవనుంది. రెండో మానవరహిత మిషన్ 2022-23 ప్రణాళిక సైతం సిద్ధంగా ఉంది. ఈ భారీ విజయానికి ఇస్రోను స్పేస్‌ఎక్స్ సీఈఓ ఎలోన్ మస్క్ అభినందించారు. ఇస్రో ట్వీట్‌పై స్పందిస్తూ అభినందనలు రాశారు. దీంతో పాటు ఆయన భారత జెండా ఎమోజిని కూడా జత చేశారు.
