మేమొక్కరమే

దైవం ప్రత్యక్షమైన దాఖలా లేదు

నన్నేదన్నా కోరుకోమన్న గురుతూ లేదు

వరమైతే ప్రసాదించబడింది ఆమెగా

పేరు కింద రాసుకునేంత చదవుకోలేదు

పేరుకి మించి రాయగల నేర్పూ లేదు

యే పరిశీలనా పాఠశాల నేర్పించిందో గాని

నా మనసు భాషలో

ఆమె పట్టా పొందిన పరిశోధకురాలు

నన్నే తనలో ఇముడ్చుకుందో

ఆమే నన్నంతా నిండిపోయిందో

నేనే వంటింటి పిడుగులను వినలేదు

నేనే అలక సంద్రాలను ఈదలేదు

నేనే కోరికల గాలులలో నెట్టేయబడలేదు

నేనే వ్యతిరేక సందర్భాలకు సమాధానాలు రాయలేదు

మా ప్రణయ జ్యోతి మాత్రమే సాక్షి

ఎలా తెలుసుకుందో

తేనె నదియై అలరించడం

ఎక్కడ అభ్యసించిందో

పూల రాశుల దారుల్లో నడిపించడం

ఎప్పుడు ఒంటబట్టించుకుందో

నిత్య వాసంతమై పరవశింపజేయడం

ఆనంద కెరటాలతో ఓలలాడుతున్నది బ్రతుకు

ఏదో జన్మలో

ప్రేమ తపస్సు చేసినందుకే అనుకుంటా

ఇంకేదో లోకంలో

అనురాగ ఆరాధనలో అర్హత సాధించినందుకే ననుకుంటా

ఇపుడిలా

తనలోని నేనుగానో

నాలోని తనుగానో

ఒక్కరమై సాగుతున్నామీ సంసార వైభవం

వేనంక చక్రవర్తి, లక్షెట్టిపేట, మంచిర్యాల జిల్లా, 9000983494