ప్రతిపక్ష పార్టీల ఐక్యత కోసం బెంగళూరులో జరుగుతున్న సమావేశానికి పోటీగా, బిజెపి నేతృత్వంలోని నేషనల్ డెమోక్రటిక్ అలయన్స్ రేపు ముఖ్యమైన సమావేశాన్ని నిర్వహించనుంది. రేపు జరగనున్న ఎన్‌డిఎ సమావేశంలో తమ భాగస్వామ్య పక్షాలైన 38 పార్టీలు పాల్గొంటున్నాయని బిజెపి జాతీయ అధ్యక్షుడు జెపి నడ్డా ప్రకటించారు. బెంగళూరులో నేటి నుంచి ప్రారంభమైన రెండు రోజుల ప్రతిపక్ష పార్టీల సమావేశంలో 26 రాజకీయ పార్టీలు పాల్గొంటున్నాయి. ఇలాంటి పరిస్థితుల్లో ఎన్డీయే సమావేశాన్ని అధికార పార్టీ బల నిరూపణగా నిర్వహిస్తున్నది.
గత 9 ఏళ్లలో ప్రధాని నరేంద్ర మోదీ బలమైన నాయకత్వాన్ని చూశామని, ఎంతో మంది ప్రశంసలు అందుకున్నామని అన్నారు. అవినీతి పట్ల జీరో టాలరెన్స్ కూడా పెరిగింది. కోవిడ్-19 నిర్వహణలో కూడా ప్రధాని ప్రపంచంలోనే ఒక ఉదాహరణగా నిలిచారని ఆయన అన్నారు. గత 9 సంవత్సరాలలో, ఎన్ డి ఏ ప్రభుత్వం సుపరిపాలన ఫలితాలు కనిపిస్తున్నాయని ఆయన అన్నారు. ఎన్‌డిఎ కూటమి భారతదేశాన్ని బలోపేతం చేయడానికి ఉద్దేశించిందని, యుపిఎ నాయకత్వరహిత కూటమి అని ఆయన అన్నారు.
మోదీ ప్రభుత్వ పథకాలు, విధానాల సానుకూల ప్రభావం కారణంగా ఎన్డీఏలోని సభ్యులు ఉత్సాహంగా ఉన్నారని యన తెలిపారు. డైరెక్ట్ బెనిఫిట్ ట్రాన్స్‌ఫర్ (డీబీటీ) కింద రూ. 28 లక్షల కోట్లను నేరుగా లబ్ధిదారుల ఖాతాల్లోకి జమ చేశామన్నారు. దాదాపు రూ.4-5 లక్షల కోట్ల వృధాను అరికట్టామని ఆయన తెలిపారు. అంతే కాకుండా పాలనలో డిజిటల్ టూల్స్ వాడకం పెరిగి పారదర్శకతను తీసుకొచ్చిందని నడ్డా తెలిపారు. లోక్ జనశక్తి పార్టీ (రామ్ విలాస్) అధినేత చిరాగ్ పాశ్వాన్ ఎన్డీయేలో చేరాలని నిర్ణయించుకున్నట్లు బీజేపీ అధ్యక్షుడు జేపీ నడ్డా తెలిపారు. ఆయనను ఎన్డీయే కుటుంబానికి స్వాగతిస్తున్నట్లు తెలిపారు. కాగా, జూలై 18న ఢిల్లీలో జరగనున్న ఎన్డీయే సమావేశానికి రాష్ట్రీయ లోక్ జనతాదళ్ అధ్యక్షుడు ఉపేంద్ర కుష్వాహను ఆహ్వానించినట్లు వార్తలు వచ్చాయి.
