ఆల్ ఇండియా మజ్లిస్-ఎ-ఇత్తెహాదుల్ ముస్లిమీన్ అధినేత అసదుద్దీన్ ఒవైసీని దేశద్రోహం కేసులో అరెస్ట్ చేయాలని భారతీయ జనతా పార్టీ ఎంపీ హరనాథ్ సింగ్ యాదవ్ ఆదివారం డిమాండ్ చేశారు. వారణాసిలోని జ్ఞాన్వాపి మసీదు సర్వేపై వివాదం నేపథ్యంలో, బిజెపి, ఆర్‌ఎస్‌ఎస్ విద్వేషాన్ని రెచ్చగొట్టేందుకు ప్రయత్నిస్తున్నాయని ఎఐఎంఐఎం అధినేత అసదుద్దీన్ ఒవైసీ శనివారం అన్నారు.
ఈ అంశంపై బిజెపి నేత తీవ్రంగా స్పందించారు. ఒవైసీ దేశంలో హిందువులు, ముస్లింల మధ్య చిచ్చు పెట్టాలని చూస్తున్నారని ఆయన అన్నారు. ఆయన భారత దేశానికి మరో జిన్నా కావాలని కలలు కంటున్నాడని అందువల్ల వెంటనే అతనిపై దేశద్రోహం కేసు నమోదు చేసి జైలుకు పంపాలని హరనాథ్ సింగ్ యాదవ్ డిమాండ్ చేశారు.
వారణాసిలోని జ్ఞాన్‌వాపీ మసీదు పై వీడియో సర్వే జరపాలని స్థానిక న్యాయస్థానం ఆదేశించిన విషయం తెలిసిందే. జ్ఞాన్వాపి మసీదును సర్వే చేయాలని స్థానిక కోర్టు ఆదేశించిందని, దానిని అలహాబాద్ హైకోర్టులో సవాలు చేశారని ఆయన తెలిపారు. దిగువ కోర్టు నిర్ణయాన్ని ముస్లిం పక్షం హైకోర్టులో సవాలు చేయగా, కోర్టు తోసిపుచ్చింది. ఈ ఆదేశాలపై ఏ వ్యక్తి, ఏ సంస్థ అయినా కోర్టును ఆశ్రయించే స్వేచ్ఛ ఉంది.
కోర్టు నిర్ణయాన్ని గౌరవించాలి. మసీదుపై సర్వే చేయడంలో ఒవైసీకి భయమేంటని బిజెపి ఎంపీ ప్రశ్నించారు. 2019లో సుప్రీంకోర్టు వెలువరించిన రామజన్మ భూమి తీర్పును ప్రజలు విస్తృతంగా ఆమోదించారని యాదవ్ ఉదహరించారు. అదే విధంగా స్థానిక కోర్టు ఆదేశాలను ముస్లింలు అంగీకరించాలన్నారు. రామజన్మభూమి తీర్పుపై ముస్లిం సోదరులు దేశంలో మత సామరస్యాన్ని అంగీకరించిన విధానం ఆదర్శనీయమని ఆయన అన్నారు. అదేవిధంగా స్థానిక కోర్టు ఆదేశాలతో జ్ఞానవాపి సర్వేకు అనుమతించాలన్నారు.
రాజకీయాల కోసం బీజేపీ మరో అంశాన్ని వెతుకుతోంది
జ్ఞాన్వాపి మసీదు ఎపిసోడ్‌పై స్పందించిన కాంగ్రెస్‌ సీనియర్‌ నేత ప్రమోద్‌ తివారీ.. జ్ఞాన్వాపి మసీదు కేసులో రాజకీయం చేసేందుకు అయోధ్య లాంటి మరో అంశాన్ని బీజేపీ వెతుకుతోందని అన్నారు. విషయం కోర్టులో ఉందని, అయితే అయోధ్య తీర్పు తర్వాత బీజేపీ పరిస్థితి రెక్కలు లేని పక్షిలా తయారైందని, ఉపాధి, ద్రవ్యోల్బణం, అచ్ఛే దిన్ వంటి అంశాల్లో రాజకీయాలు చేయలేరని ఆయన అన్నారు.
ప్రజలు కాశీ విశ్వనాథ ఆలయాన్ని సందర్శిస్తారు మరియు జ్ఞాన్వాపి మసీదును కూడా సందర్శిస్తారు. రాజకీయ లబ్ధి కోసం బీజేపీ ఈ అంశాన్ని లేవనెత్తేందుకు విఫలయత్నం చేస్తోందని ఆయన అన్నారు.
