పోలీస్స్టేషన్, ఈ మాట వింటే చాలు చాలా మందికి దడ దడ . చీకటి గదుల లాకప్లు, ఖాకీ డ్రెస్సులో గంభీరంగా ఉండే పోలీసులను చూస్తే దడ పుట్టేస్తుంది. అంతకు మించి వారు తంతారనే భయం.కానీ, ఇకపై పోలీస్స్టేషన్లకు వెళితే మాత్రం కావాల్సినంత నవ్వు కోవచ్చు.కడుపారా నవ్వాలా అయితే పోలీస్ స్టేషన్ కు వెళ్ళండి. కారణం ఆ పోలీస్స్టేషన్లలోని కార్టూన్ల మహిమ! అవును, జనాల్లో పోలీస్స్టేషన్ అనే భయాన్ని పోగొట్టేందుకు కేరళ పోలీస్ డిపార్ట్మెంట్ ఈ కార్యక్రమాన్ని రూపొందించింది. రాష్ట్రవ్యాప్తంగా ఉన్న 481 పోలీస్స్టేషన్ల గోడలపై కార్టూన్లు వేయించేందుకు నిర్ణయించింది.
రెండు నెలల్లో అన్ని పోలీస్స్టేషన్ల గోడలపై కార్టూన్లను వేసే ప్రోగ్రామ్ను కేరళ డీజీపీ లోక్నాథ్ బెహరా ప్రారంభించారు. ఇప్పటికే ఫోర్ట్, వలియథురా, కోవలం, వంచియూర్, మ్యూజియం, పెరూరకడ పోలీస్స్టేషన్లలో ఏర్పాటు చేసేందుకు కార్టూన్లూ అందాయి. నవ్వు తెప్పించేవే కాకుండా సమాజానికి అవసరమయ్యే యాంటీ కరప్షన్, హ్యుమానిటీ వంటి వాటినీ కార్టూన్ల రూపంలో చెప్పనుంది. ఆసక్తి ఉన్న వారు ఎవరైనా కార్టూన్లు వేసి పంపించొచ్చని బెహరా చెప్పారు.