అద్భుత ప్రచలిత తరగలు గుండెలోనికి
చేరవేస్తున్న వేళ లోకం కన్నుతో చూడు!
సంకెలలు తెగినసౌందర్యంలో
దగ్గరితనాన్ని మరింత కలిపేస్తూనే
దూరాలెంచమనని సందర్భమిది.
విలువలచరితుల, సమరవీరుల త్యాగ ఫలితమిది
రక్తంరాలని యుద్ధ విజయమిది !
సర్వమత స్నేహాలు వజ్రసంకల్పమై,
మహోజ్వలమై, భవ్య స్వేచ్ఛాభారతమై
కాలయవనికపై మూడురంగుల వందన
గీతాలయినవి !!
ఆదర్శాల ఆశయసిద్ధి మనదయ్యేందుకై
అంతఃకలహాల పరదాలుతొలిగి
హృదయ తెరల చెరసాలలు వీగి
సమస్తం వెలుగుల జ్ఞాననక్షత్రమవ్వాలి!
అదిగో ,
ఆకసాన తెల్లపావురాల వారధి ఉన్నది
నేలతల్లి అడుగడుగున ప్రేమఫలాలు
పంచుతున్నది .
బద్ధవైరాల విశుద్ధరాగాల్ని గద్దకన్నుల కపటాలకు చిక్కనీయక
బహువిధ శాంతం ,
స్వచ్ఛ సౌభ్రాతృత్వం,
సమతాధ్యానం జెండాదండమవ్వాలి!
త్రివర్ణ పతాక భావం అంతఃకరణ శుద్ధత్వమై వెలగాలి!!
– కొండపల్లి నీహారిణి