మెట్లులేని నిచ్చెన ఎత్తైన తాటిచెట్టు
పండిన తాటిగెలలను కొట్టి
కిందకు తోసాడు
పైన కుర్చీని అధిష్టించాడు
అక్కడ అన్నీ విషసర్పాలే
వాటి కుత్తుకల విషాన్ని
తన మేధోబలంతో లాగేసాడు
అంతర్గత కుమ్ములాటల ముఠాల మధ్య
కళ్శం లేని చీకటి గుర్రంపై
స్వారీ చేయడం మొదలు పెట్టాడు
దేశమంతా అలముకున్న ఆర్ధిక అంధకారం
పెనుతుఫానులో మునిగిపోతున్న
మన దేశపు ఓడను
లంగరేసి కాపాడిన అపర చాణుక్యుడు
కూలిన వంతెన మధ్య ఇరుక్కున్న మనిషి
విశ్వమంతా విస్తరించాడు
చేతులెత్తి దణ్ణం పెట్టే సూర్యుడయ్యాడు
ఒక వేకువన చెట్టు నుండి ఆకులా రాలిపోయాడు
దేశ రాజధానిలో చితిపై పండాల్సిన
ఆ పార్ధివదేహాన్ని పరుగులెత్తించారు
నీలిమంటల మధ్య కాలుతున్న
దేహం కోసం కన్నీటి చుక్కలు
రాల్చిన మేఘాలెన్నో
శతాబ్దాల నుండి బీటలు పడ్డ నేల
గుప్పెడు బూడిదను తనలో కలుకుంది…..
పొత్తూరి సీతారామరాజు, కాకినాడ