కం 01 :సింగారమొలుకు గ్రామము
వంగరలో జననమొంది
వరలెను జగతిన్
రంగారు గుణము గల్గిన
బంగరు హృదయ జననేత
ప్రాజ్ఞుడు పీ.వీ.
కం 02: బహుభాషా కోవిదుడై
సహనము నిండిన మనీషి
చతురుండతడున్
సహచర గణములు మెచ్చగ
మహనీయత జూపినట్టి
మాన్యుడు పీ.వీ.
కం 03: మిక్కిలి సంస్కరణమ్ముల
చక్కగ సల్పి మనదేశ
సంపద బెంచెన్
ఒక్కడు పదుగురి తోడై
చిక్కని పాలనము జేసె
శ్రియముగ పీ.వీ.
కం 04: నీతిని దేశాన నిలిపి
ఖ్యాతిని యంతట గడించె
కరుణా మూర్తిన్
జాతిని రక్షింపగ తా
జేతగ పాలించె మనల
చేవగ పీ.వీ.
కం 05: భారత ప్రధాని పదవిని
ధీరతతో నెఱపె తాను
ధిషణా పటిమన్
మీరక విధినమరుండై
తారగ గగనాన నిలిచె
ధన్యుడు పీ.వీ.
కీర్తి పురస్కార గ్రహీత,శతకశ్రీ అమ్మన చంద్రారెడ్డి, సిద్దిపేట, చరవాణి : 9948936083