నెర్రల భూమిని కొత్తగా
నెర్రలు పడిన పాదాలు తాకాయి
ఊసురంటున్న ఊరుకు
ఉడుకు రక్తం తోడై
పల్లెలన్నీ తొలకరికి కొత్తరాగం అందుకున్నాయి
నమ్ముకున్న నగరి నట్టేట ముంచినా
పచ్చదనం పల్లెచీర
తల్లికొంగు వోలె గుండెకు హత్తుకుంది
మనిషిని నమ్మి మట్టిగా మిగిలిన
గుండెల బొబ్బలకిపుడు
తొలకరి వాన చినుకులు కురిసి
ప్రకృతి లేపనమై సేదతీరుస్తుంది
గతజన్మల తాలూకు తాపీ పనుల
పేకమేడల ఆకాశ హర్మ్యాలు
చుక్కలయి భూమిమీద వాలాయి
భూమిపై నక్షత్రాల పంటకు సమయమాసన్నమైంది
స్వచ్ఛమైన గాలి ఊరు నీదై
నీకోసం ఈ వేళ ప్రపంచం
ముసుగులు తీసి ఊపిరిపోస్తూ
నీకోసం వేచి చూస్తుంది..
పొలంపై పరిచిన పంతం నీదైతే చాలు
ఏరువాక సాగు కొనసాగుతుంది
బక్కచిక్కిన రైతుకు నీ రెక్కతగిలించు
మట్టిని నమ్మితే ఫలితమేమిటో గమనించు
నగరిని నిండిన జనం పల్లెను పూరిస్తే
పచ్చని చెట్లు పులకరించడమేకాదు
బుక్కెడు మెతుకులను మోసంచేయక పచ్చని తివాచీతో సహా బహూకరిస్తుంది .
డా. సమ్మెట విజయ, హైదరాబాదు
