కొత్త పాటలతో పిచ్చుకల హడావిడి పరుగు
మసిబూసుకుంటున్న ఆకాశాన్ని చూసి
బంధువుల రాకను గమనించిన చిన్నపిల్లలై తలలూపుతూ నిలుచున్న చెట్లు
నిప్పులు రాల్చుతున్న సూర్యుణ్ణి చికాకు పడి
ఆవిరైపోతున్న కడలి
కరోనా మాటకు కట్టుబడి గిరిగీసుకున్న వృత్తాల్లో నిలబడి చూస్తున్న వేడి మట్టి
సాయంత్రాన్ని వొంపుకున్న నింగి
తడియారి జబ్బుజబ్బుగా చుట్టుకుపోయిన తులసి ,తమలపాకు ముఖాల్లో ఏదో సంతోషం
కొమ్మలపై వాలి తుర్రున ఎగిరి మళ్ళీ వచ్చి వాలుతున్న పిచ్చుక రెక్కలపై టప్ టప్ శబ్దం
దాని చిట్టితల విదిలిస్తూ అటూఇటూ చూపులు
ఆకులపై టపటపా కురుస్తున్న వాన
డాబా పైనుండి సన్నగా జారుతున్న నీటిధార
ఎదురుచూపుల్లో
ఉన్న వేసవిని చల్లగా తడుపుతున్న ఆకాశం
గాఢమైన శ్వాసలతో ఆవిరినవ్వుల్లో మునిగిన భూమిదేహం
ముఖం మాడిన రైతుకు మట్టివానసనే ప్రాణవాయువు
చల్లబడి తేలికైన గాలిసంగీతం
కుండీల్లో నిండిన వాననీళ్ళతో స్నేహం చేస్తున్న మొక్కలు
నేనూ అంతే చేయిచాచి నిలుచున్నా చినుకులను హత్తుకుని తన్మయంగా
వాన…శరీరాన్నే కాదు మనసునూ తడిపేస్తుంది చల్లని కౌగిలింతలో!!
-అరుణ నారదభట్ల, హైదరాబాద్