మతి లేని పనులతో
అతి చేయుట వల్లనే
వెతలను వెతికి తెచ్చుకున్నాడు
ముప్పును తన తప్పుకు బదులుగా
కొనితెచ్చుకుంటున్నాడు
అంతా ప్రకృతి ఆనతి లేని
వికృతి పనులే
ఆకృతికే మోసం తెచ్చే
నాగరికత ముసుగులో వికృత విధానాలే
ప్రకృతి సిద్ధ వరాలన్నింటినీ
చేతులారా శాపాలుగా మార్చుకుంటున్న వైనం
వాతలు తగులుతున్నా
మార్పు కానరాని మనిషి నైజము
బ్రతుకు పట్టాలు గతి తప్పుతున్నా
కుటుంబాలు దుర్గతికి లోనవుతున్నా
తన చితిని తానే పేర్చుకుంటాడే కానీ
ఈ విపత్తుకు తన చేతివాటం
కూడా ఉందని చింతించడే
మనఃస్థితిలో మార్పు రానంతవరకు
మన స్థితిలో కనపడదులే రాయంచ మార్గం
పరుల దుస్థితిలో చేయుతనందివ్వడం తప్ప
పరిస్థితిలో మార్పును ఆశించలేవు
ప్రకృతిలో భాగం నీవు
నీకు హితమైతే చాలదు
పరహితం కూడా ఆలోచిస్తేనే
జనహితమైన పర్యావరణం
కీకారణ్యం లా భయపెట్టకుండా
నందనవనంలా భాసిల్లుతుంది
నవీనంగా ఉన్నా విలువలతో
శోభిల్లుతుంది
అపుడే పంచభూతాలు కూడా
ప్రాణికోటిని కాపాడే పంచప్రాణాలుగా
మానవాళికి కవచకుండలాలుగా
జగత్తును బహు జాగ్రత్తగా కాపాడే
జగత్ రక్షకుల్లా వ్యవహరిస్తాయి
మంజుల సూర్య, హైదరాబాద్