సమశంఖం పూరిద్దాం

ఆరుగాలం అహర్నిశలు  శ్రమిస్తూ

స్వేదమును జీవ రసాయనంగా మార్చి

పల్లెసీమకు పచ్చదనాల లేపనమద్ది

దేశాన్ని అన్నపూర్ణగా మలిచే అన్నదాతలు

జగతి ప్రగతి పథానికి భాగ్య విధాతలు

చీకటి పొద్దుల్లో వెలుగులీను సూర్యులై

మట్టి పరిమళాల గుభాళింపులో మమేకమై

అనునిత్యం ప్రమాదపు అంచుల్లో పయనిస్తూ

దేశానికి పసిడి సిరులందించే పరోపకారతడు

అతివృష్టి అనావృష్టిలను తట్టుకుంటూ

దిగులు మేఘాలు కమ్మిన కలతల మదిలో

కాంతిరేకలను నిబ్బరంగా నింపుకుని

ప్రకృతి విలయాలకు ఎదురొడ్డి నిలుస్తాడు

ఆశల విత్తులు నాటి ఆశయాల రెక్కలు తొడిగి

అలుపెరుగక సేద్యం చేసే కృషీవలుడతడు

సంక్షేమం పేరిట నూతన వ్యవసాయ చట్టాలు

కర్షక వీరుల కర్మఫలాలను కబళించివేస్తూ

అస్తిత్వాన్ని అణచి వేసే అయుధమవుతుంటే

తరతరాల రైతన్నల  శ్రమ దానం నిష్పలమై

సమస్యల సుడిగుండంలో  కూరుకుపోతున్నారు

కార్పొరేట్ కాలసర్ప పరిష్వంగంలో బలి కాకుండా

హాలికుల కంటినీరును నింపుకున్న కలాలమై

తడియారని గాయాల గేయాలను ఆవిష్కరించాలి

శ్రమదోపిడిని ధిక్కరించే నిరసన గళాలమై

తిరుగుబాటు బావుటానెత్తిన పోరుబాటకు

సంఘీభావం తెలిపే స్వరాలమై భరోసానందిద్దాం

పులి జమున-మహబూబ్ నగర్, 8500169682