పృధ్వి మీద వెలసిన
అన్నం పెట్టే దేవత అన్నమ్మవు
జల ప్రళయాలు రాకుండా
కాపాడే గంగానమ్మవు
సూర్య చంద్రులనే
కుడి ఎడమ కన్నులుగా
మలచుకున్న ఇరుకుళమ్మవు
భీకర వాయువుల నుండి
కాపాడే కరువలమ్మవు
ఉరుములు పిడుగుల నుండి
రక్షించే ఆకాశ దేవతయైన కొండమ్మవు
తలచిన మాత్రమే కోరిన కోర్కెలు
తీర్చే తలపులమ్మవు
పొలిమేరలను కాపాడే పోలేరమ్మవు
క్రిమి కీటకాలను భూత ప్రేత పిశాచాలను
ఊడ్చి పారేసే శీతలాంబవు
పుట్టలోని పాముల నుండి
కాపాడే పుట్టమ్మవు
అందరినీ పోషించే పోచమ్మవు ఎల్లమ్మ, మైసమ్మ, పెద్దమ్మ,లంకమ్మ
పంచభూతాలంతటా వ్యాపించి
అందరికీ మూలమైన ఆదిశక్తి వి నీవు
మా గ్రామాల్నీ, మమ్మల్ని మా బిడ్డల్ని
పంటల్ని, పశువుల్నీ, చెట్టు చేమల్నీ
సల్లంగా చూడు
ప్రపంచాల్ని కబళించే అంటువ్యాదుల
నుండి మము రక్షించు
ఏటేటా నీకు బోన మిస్తా, చద్దులిస్తా
యాట నిస్తా, భక్తి తొ మొక్కుత
మా మీద దయ చూపు తల్లి
జగజ్జనని జైమాత
పీ.వీ.యస్. కృష్ణ కుమారి, తుర్కయాంజాల్