తెలంగాణలోన ఆషాడమాసాన
అమ్మోరుతల్లి అవనికి దిగివచ్చే
మైసమ్మ పోచమ్మ ఎల్లమ్మ పెద్దమ్మ
డొక్కాలమ్మ అంకాలమ్మ పోలేరమ్మ మారెమ్మా
ఏపేరుతో పిలిచినా పలికేది దుర్గనే
మట్టికుండలోన పాలు పెరుగు బెల్లముతోను
బోనమొండి తేవంగ అమ్మ ఆరగింపగవచ్చె
ఆడపడచులంత పట్టుచీరలుగట్టి నగలెన్నోపెట్టి
ముత్తైదువుతనంతో గుంపుగాచేరి
కుండకు నిండుగా పసుపుకుంకుమరాసి
అమ్మోరు రూపును అందముగదిద్ది
వేపాకు రెమ్మలను బోనానికిచుట్టి
బతుకువెలుగు నిచ్చు దీపాన్ని వెలిగించి
తలపైన తీరుగా బోనమెత్తుకుని
భక్తిపరవశము తోను భధ్రంగతెచ్చి
అమ్మోరుతల్లికి నైవేద్యమర్పించి
ఆపైన కోళ్ల ను మేకలను బలియిచ్చి
ఆరోగ్యం సంపద సుఖశాంతులిమ్మనీ
అమ్మోరుతల్లిని ఆర్తితోవేడగా అమ్మ శాంతించి
సంతోషించీ అడిగినవన్ని ఇచ్చి ఆనందపరచె
ఒళ్ళంతా పసుపుకుంకుమతోను అమ్మసోదరుడు పోతరాజు రంగమాడంగ చూడ కన్నులపండుగే
గోల్కొండలోన ఎల్లమ్మగ మొదలు
సికింద్రాబాద్ ఉజ్జయిని మహంకాళి తల్లిగ
జూబ్లీహిల్స్ లో పెద్దమ్మతల్లిగ
పాతబస్తీలో లాల్దర్వాజ సింహవాహిని మాతేశ్వరితల్లిగ
జగతినేల వచ్చె జగదాంబికామాతగ
గోల్కొండకోటలో ఆఖరి పూజలందుకుని
బిడ్ఢలను రక్షింప గ్రామ దేవతయై
ఊరి పొలిమేరలలోన కొలువుండె మాయమ్మ
గంజి కళావతి శ్రీనివాస్, నల్లగొండ, 9912589703