ఎక్కడ ఎడారులు విరబూసినా
అక్కడ వారి స్వేదజలపు సంతకమే
ఎక్కడ మేడలు నింగిని ముద్దాడినా
అక్కడ వారి శ్రమ పునాదిరాళ్ళ కేతనమే
ఎక్కడ మన పయనం సుఖభోగమై సాగినా
అక్కడ రహదారులై పరుచుకునేది
దుఃఖభాజనమైన వాళ్ళ జీవనమే
గనిలో వనిలో కార్ఖానాల్లో
ఎక్కడ పని వుంటే అక్కడ పనిముట్టై
ఊడిగం చేసేవాళ్ళూ ఉత్పత్తులు పెంచేవాళ్ళూ వాళ్ళే!
వాళ్ళు
తమ శక్తిని నమ్ముకునే వాళ్ళే కానీ
వ్యక్తిత్వాన్ని అమ్ముకునే వాళ్ళు కాదు
చెమటను చిందించేవాళ్ళే కానీ
చీదరించుకునేవాళ్ళు అసలే కాదు
కట్టుబానిసత్వపు బంధనాల్లోంచీ
వెట్టిచాకిరీ కబంద హస్తాల్లోంచీ
హక్కుపిడికిళ్ళై లేచిన వాళ్ళు
ఉదయ కెరటాలై ఎగసిన వాళ్ళు
కార్మికులన్నా శ్రామికులన్నా లేబర్లన్నా
ఏ పేరుతో పిలిచినా…
ఎర్రజెండా నీడలో సేదదీరే వెర్రిబాగులవాళ్ళు
ఖాకీ బట్టలే తోడుగా అగ్నిదాహాల్ని ఆర్పుకునే
అర్ధనగ్న దేహులు వాళ్ళు!
నూటెంకి రవీంద్ర, లక్షెట్టిపేట, 9491533295