అక్షరాల కెందుకనో
అమ్మంటే మరీ మక్కువ
అమ్మ అనే మాట
తలపుకొస్తే చాలు
పాపల్లా పారాడుతూ వచ్చి
పదాలై పరుగు లిడుతాయి
గారాలు పోతాయి మారాము చేస్తాయి
వాత్సల్యంగా అల్లుకుపోయే
వాక్యాలు సైతం
కావ్యాతిశయాలై చెంగలిస్తాయి
అమ్మ రూపు బొమ్మ కట్టాలంటే
వర్ణమాలే కాదు
వర్ణాలూ అర్ణవాల్లా పోటెత్తుతాయి
పర్వవేళా తరంగాలై అపూర్వంగా
అమ్మను కీర్తించమంటే
అన్నమయ్య సంకీర్తనలై
చిందులేస్తాయి మనోభావాలు
భావుకతేమో అపురూప భావచిత్రాలై
అద్భుతమైన చైత్రరాగా లాలపిస్తుంది
అమ్మ ప్రస్తుతి చేయని కవీ
అమ్మ ప్రస్తావన లేని కావ్యమూ
దుర్లభమంటే
అది స్వభావోక్తి అలంకారమే సుమా!
నిజానికి
అమ్మే
రెండక్షరాల ఏకైక వేదం
ఇలపై నిలిచిన ప్రేమైక దైవం
మాతృత్వం పొందని
మహిళ ఉంటుంది గానీ
అమ్మతనం లేని అతివంటూ
కానరాదు
యే లోకాన వెతుకబోయినా!
నూటెంకి రవీంద్ర, లక్షెట్టిపేట, 9491533295.