చీకటి గుహలో
నిర్మానుష్య నీలి పర్వత శ్రేణుల్లో
పొడి పొడి గా మసులుతున్నావు
అగ్నిపర్వత శిఖర బిలంపైనుండి
ఎర్రెర్రని జ్వాల కవోష్ణలావా గా
పరుగెత్తుకుంటు రావాలని
ఎంత గానోతపిస్తున్నావు
ఎన్నో ఏండ్లుగా
నీకై వేచిన నేల పునీతం కావాలని
వాడివడి తగ్గిన తనువుకు
వేడితగిలి వడిపెరిగి
తకిట తకిట తకిటతా అంటూ
లయాన్వితంగా
భయాన్వితంగా
దారి పొడుగున
శార్ధూల మత్యేభాల
గర్జనలు వింటూ…
ప్రకృతి రమణీయమణికి
పచ్చల హారాలు
నీ ఆహ్వానం కోసం
చంపకాలు ఉత్పలమాలికలు
సిద్ధంగా ఉన్నాయి
నీవు సరళమైన ప్రజాభిష్టానికి
జనపదమై ఆనందపదమై
విలయతాండవ లయ కాస్తా
కిలకిల రావంగా
ప్రత్యూష స్పర్శలా
సుగమన రాగమై
ప్రియజన భావమై
నిత్యనూతన మయ్యావు
రంగురంగుల కలలో నిద్రపుచ్చక
మేలుకొల్పు ప్రభాత గీతమై
రా ఇదే మా ఆహ్వానం
రేడియమ్, ఫోన్ నెం: 9291527757
