ఆత్మీయ బంధం

తరువు ప్రకృతి పచ్చదనానికి నిదర్శనమై

గలగల పారే జలసిరులకు ఆదెరువవుతుంది

ప్రతిఫలాపేక్ష లేకుండానే  ఫలాల నందిస్తూ

త్యాగ గుణంతో ఆకలిని తీర్చే  అన్నపూర్ణవుతుంది

మండుటెండలో అలసిన జీవులకు

చలువ పందిరై సేదతీర్చే నేస్తమవుతుంది

పెరిగే ఉష్ణోగ్రతలకు చెట్ల పెంపకమే

శీతల లేపనమై ఆదుకునే హస్తమవుతుంది

ప్రకృతి అసమతౌల్యతను నిరోధించి

పచ్చలతోరణమై చెట్టు ఆయువుపట్టవుతుంది

సంప్రదాయ వన మూలికలకు మూలమై

ఆరోగ్యాన్నందించే ఔషధమవుతుంది

కాలుష్యాన్ని తరిమి వేసి సర్వజీవులకు

స్వచ్ఛమైన గాలినందించే ప్రాణదీపమవుతుంది

సామాజిక స్పృహతో వృక్షాలను సంరక్షిస్తేనే

భవిష్యత్తరాలకు రక్షణనందించే కల్పతరువవుతుంది

తరువు మానవ మనుగడకు మూలాధారమై

అనునిత్యం పెనవేసుకున్న బంధమవుతుంది

పులి జమున, మహబూబ్ నగర్, 8500169682