చెమట చిందించే పనితనం నీదే
పస్తులుండి పిల్లలకు పెట్టే తల్లిప్రేమ నీదే
పొద్దున్నే లేచి పాచిపనులు చేసి
పనికోసం పరుగులెత్తి
రెక్కలు ముక్కలుగ చేసుకుని
బొంగరంగా గిరగిరా తిరిగి వచ్చి
ఇంటి పనులు చేసి
అన్నం పెట్టే అన్నపూర్ణ నీవే
అవిశ్రాంత జీవనంలో
కంటిమీద కునుకు లేదు
కడుపు నిండా తిండీ లేదు
అయినా తాగివచ్చి తంతే
మొగుడితో దెబ్బలు తింటావు
ఊరూ వాడా పంచాయితీలో
నిలబడి పోరాడుతావు
కన్నబిడ్డలకోసం ఆరాటపడతావు
రాత మార్చాలని బడులకు తోల్తావు
నిలువ నీడ కోసం నానా పాట్లు పడతావు
చిట్టీలు కడతావు
చిల్లర కూడేస్తావు
గుట్టుగా బతకాలని బండచాకిరీ చేస్తావు
ముప్పతిప్పలు పెడుతూ
కష్టాన్ని కర్పూరంగా కరిగించే మొగుడితో
సర్దుకుపోతుంటావు
మనుగడకోసం పోరాడుతూ బిడ్డను చుట్టుకుని
ఇటుకలు మోస్తావు
నిన్నే చూసే ఆ బిడ్డలో ఆనందాన్ని
ఎన్ని కుంచెలతో చిత్రించను
ఎన్ని మాటలతో నీ శ్రమను వర్ణించను
శ్రమైకజీవన సౌందర్యానివి నీవు
బతుకు పాటలో రాగం నీవు
నిత్యపోరాట విజయం నీవు
ఎందరికో స్ఫూర్తినిచ్చే ధీరవనితవు నీవు
డా.సమ్మెట విజయ
