వేకువ వాకిట ఉషోదయ ఉషస్సు అవుతూనే
ఇంటిల్లిపాదికీ ఆత్మీయ అక్షయపాత్రవుతుంది
లలిత లావణ్య సుమ సుకుమారత్వంతో
ఆత్మీయ లతలనల్లే కల్పవల్లవుతుంది
రుధిరాన్ని క్షీరంగామార్చి పిల్లలనుపెంచడమే కాదు
దేశాన్ని సమర్థవంతంగా పరిపాలిస్తుంది
తడియారని తపనలతోనే నిత్యం తల్లడిల్లుతూనే
త్యాగ భావాలకు తరగని పెన్నిధి అవుతుంది
ఆంక్షల కంచెలను ఛేదించి ఆత్మవిశ్వాసంతో
విభిన్న రంగాలలో విజేత అవుతుంది
ఆగ్రహిస్తే అనలకీలలు కురిపించే అగ్నిగోళమై
దుర్మార్గాన్ని దునుమాడే ఆదిశక్తి అవుతుంది
ఆటుపోటులెదురైనా అంతర్యుద్దం చేస్తూనే
చెదరని చిరునవ్వులకు చిరునామా అవుతుంది
గాయాలను అస్తిత్వపు పునాదులుగా మలచి
చులకన చేసే సమాజానికి సవాలు చేస్తూ
అంతరిక్షానికెగసి అవనికి కీర్తి పతాకవుతుంది
ఎంత ఎదిగినా ఒదిగి వుండే సహనంతో
సకల కళానిధియై అద్భుతాలను ఆవిష్కరిస్తుంది
అలుపెరుగని ఓర్పుతో ప్రగతిపథంలో పయనించే
ఓ మహిళా నీకు వేనవేల వందనాలు
పులి జమున, మహబూబ్ నగర్, 8500169682.