ఇండియన్ స్పేస్ రీసెర్చ్ ఆర్గనైజేషన్ (ఇస్రో) మరియు ఇంటిగ్రేటెడ్ డిఫెన్స్ స్టాఫ్ సంయుక్తంగా హైపర్సోనిక్ వెహికల్ టెస్ట్ నిర్వహించారు. ట్రయల్స్ అన్ని అవసరమైన అర్హతలు సాధించాయి. అంతే కాకుండా పూర్తి సామర్థ్యాన్ని ప్రదర్శించింది. ఈ పరీక్ష తర్వాత భారత్ రక్షణ రంగం మరింత పటిష్టం కానుంది. ముఖ్యంగా పాకిస్థాన్, చైనాల కుయుక్తులను తిప్పికొట్టేందుకు ఇదో ముఖ్యమైన ఆయుధంగా మారుతుంది. ఈ వాహనం ప్రత్యేకత ఏమిటంటే ఇది ధ్వని వేగం కంటే ఐదు రెట్లు వేగంగా ప్రయాణిస్తుంది. హైపర్సోనిక్ వాహనాలు అంతరిక్షంలోకి వేగవంతమైన ప్రయాణం చేయడం ద్వారా సుదూర ప్రాంతాలకు వేగవంతమైన సైనిక ప్రతిస్పందనను సమకూరుస్తాయి.
హైపర్సోనిక్ వాహనం ఏరోప్లేన్, క్షిపణి లేదా అంతరిక్ష నౌక కావచ్చు. హైపర్సోనిక్ టెక్నాలజీ అనేది సరికొత్త అత్యాధునిక సాంకేతికతగా పరిగణించబడుతుంది. చైనా, భారతదేశం, రష్యా మరియు యుఎస్‌తో సహా అనేక దేశాలు హైపర్సోనిక్ ఆయుధాలను మరింత అభివృద్ధి చేయడంలో నిమగ్నమై ఉన్నాయి. భారతదేశం గత కొన్నేళ్లుగా హైపర్సోనిక్ టెక్నాలజీపై పని చేస్తోంది. రష్యాతో కలిసి హైపర్సోనిక్ క్షిపణుల తయారీలో భారత్ నిమగ్నమై ఉంది.
ఈ సంవత్సరం, రష్యా తన కింజాల్ హైపర్సోనిక్ క్షిపణిని ఉక్రెయిన్ యుద్ధంలో ఉపయోగించింది. భారతదేశం తన హైపర్సోనిక్ టెక్నాలజీ డెమాన్‌స్ట్రేటర్ వెహికల్ ప్రోగ్రామ్‌లో భాగంగా స్వదేశీ, ద్వంద్వ సామర్థ్యం గల హైపర్సోనిక్ క్రూయిజ్ క్షిపణిని కూడా అభివృద్ధి చేస్తోంది. ఈ క్షిపణి సంప్రదాయ ఆయుధాలతో పాటు అణ్వాయుధాలను కూడా ప్రయోగించగలదు.
