బిజెపి-టిఆర్‌ఎస్‌ పార్టీలు రెండూ కలిసే పని చేస్తున్నాయని ఏఐసిసి అధ్యక్షుడు మల్లికార్జున ఖర్గే అన్నారు. పార్లమెంటులో ఏదైనా బిల్లు పెట్టినప్పుడల్లా టీఆర్ఎస్ పార్టీ వారు బీజేపీకి మద్దతు ఇచ్చేవారని ఆయన గుర్తు చేశారు. అయితే కేంద్రంలో బీజేపీయేతర ప్రభుత్వం రావాలని టీఆర్ఎస్ పార్టీ పైకి చెబుతూ ఉంటుందని ఆయన అన్నారు. తెలంగాణలో భారత్ జోడో యాత్ర సందర్భంగా కాంగ్రెస్ అధ్యక్షుడు మల్లికార్జున్ ఖర్గే ప్రధాని మోదీని టార్గెట్ చేశారు. బీజేపీ, టీఆర్ఎస్ మధ్య పొత్తు ఉందని ఆరోపించారు.
గత ఆరు రోజులుగా ప్రధాని మోదీ గుజరాత్‌లో పర్యటిస్తున్నారని ఖర్గే తెలిపారు. హిమాచల్ ప్రదేశ్‌కు ఓటింగ్ షెడ్యూల్ విడుదలైంది, అయితే మోర్బిలో కూలిపోయిన వంతెనలాగా ప్రధాని మోడీ అక్కడ మరిన్ని వంతెనలను ప్రారంభించాల్సి ఉన్నందున గుజరాత్‌లో పోలింగ్ షెడ్యూల్ విడుదల కాలేదు అని మల్లికార్జున ఖర్గే అన్నారు. మీ సీఎం (కేసీఆర్) ఎన్నికల ముందు డ్రామాలు చేస్తారు కానీ నేరుగా ప్రధాని మోదీతోనే ఫోన్ లో మాట్లాడుతుంటారని కాంగ్రెస్ నాయకుడు రాహుల్ గాంధీ అన్నారు.
ప్రధాని మోదీ మీ సీఎంను ఫోన్‌లో ఆదేశిస్తుంటారని ఆయన అన్నారు. హైదరాబాద్‌లోని చార్మినార్ ఎదుట కాంగ్రెస్ అధినేత రాహుల్ గాంధీ మంగళవారం త్రివర్ణ పతాకాన్ని ఎగురవేశారు. దాదాపు 32 ఏళ్ల క్రితం ఆయన తండ్రి, అప్పటి పార్టీ అధ్యక్షుడు రాజీవ్ గాంధీ కూడా ఇదే స్థలం నుంచి ‘సద్భావ యాత్ర’ ప్రారంభించారు. రాహుల్ గాంధీ జాతీయ జెండాను ఆవిష్కరించిన సమయంలో కాంగ్రెస్ ప్రధాన కార్యదర్శి జైరాం రమేష్, పార్టీ సీనియర్ నేత దిగ్విజయ్ సింగ్, తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు రేవంత్ రెడ్డి కూడా ఉన్నారు.
‘భారత్ జోడో’ నినాదాలు, రోడ్డుపక్కన నిలబడిన జనం మధ్య రాహుల్ గాంధీ చార్మినార్ చేరుకున్నారు. ఈ సందర్భంగా చార్మినార్‌కు వెళ్లే రహదారులపై పెద్ద సంఖ్యలో కార్యకర్తలు పార్టీ జెండాలతో బైఠాయించారు. ఈ సందర్భంగా వేదికపై రాహుల్ గాంధీ తన తండ్రి రాజీవ్ గాంధీ చిత్రపటానికి పూలమాలలు వేసి నివాళులర్పించారు. రాహుల్ గాంధీ త్రివర్ణ పతాకాన్ని ఎగురవేసిన ప్రదేశం నుంచి 1990 అక్టోబర్ 19న రాజీవ్ గాంధీ ‘సద్భావన యాత్ర’ ప్రారంభించారని కాంగ్రెస్ ప్రధాన కార్యదర్శి జైరాం రమేష్ తెలిపారు. ప్రతి ఏటా కాంగ్రెస్ ఇక్కడ త్రివర్ణ పతాకాన్ని ఎగురవేస్తుందని చెప్పారు. ఈసారి అక్టోబర్ 19న ఇక్కడ త్రివర్ణ పతాకాన్ని ఎగురవేయలేకపోయామని, అందుకే మంగళవారం జాతీయ జెండాను ఎగురవేసినట్లు రమేష్ తెలిపారు.
