పట్నం పనికి సెలవునిచ్చి
సొంతూరికి దారిచూపుతుంటే
మూడు రోజుల ముచ్చట
మూడు కాలాలకోసారి
మురిపెంగా కాళిడేవేళ
అనురాగం గాలిపటమై
అంబరపు అంచుల్ని తాకగా
పవిత్రత గొబ్బమ్మ రూపమై
స్వచ్ఛ రాగమాలపించగా
జీవితం రంగవల్లిగా మారి
నవ క్రాంతిని స్వాగతించగా
పొలం అలిసిన హలానికి
విశ్రాంతిని అరువుగా ఇచ్చి
పంటను ఇంటి గుమ్మానికి
పరవశంగా పంపించేవేళ
అందాన్ని అద్దుకున్న పల్లె
చలిని చంకనబెట్టుకుని
ఉత్సవాన్ని తలకెత్తుకుని
గడప గడపనా ఉరకలేస్తూ
పొంగిపోయే సంబరం సంక్రాంతి !
గుండేటి రమణ 9949377287