ఆమె మంచుతెరలలో ఊరేగుతున్న సూర్యునికి దారినిస్తూ
తెల్లని ముగ్గు గీతలకు రంగుపూలను జోడిస్తుంది
అలికి తీర్చిన గచ్చపై కొన్ని చిక్కుముడులను విప్పుతూ
చుక్కల్ని పేర్చి మెలికలు తిప్పుతూ ఉంటుంది
వెలుగు రాగాలను అద్దుతున్న పిచ్చుకలకు
పెంకుటింటి చూరులో ఒడ్ల ఎన్నులతో విందుచేసి తొలిచూలు పిలగానిలా సాగుతుంది
పిండి ముద్దతో కళారూపాల సృష్టికి తనమునకలవుతుంది
ఉత్తరాయణం కోసం చూస్తుందో
కొండపిండి పూలరెమ్మలతో గొబ్బెమ్మల పదిలంగా పేర్చుకుంటూ
నారాకకై గుండె చప్పుళ్లను వెదజల్లుతుందో
ఎగురుతున్న పతంగులలో నన్ను నాబాల్యాన్ని వెతుకుతుంటుంది
నా పసితనపు పల్లెపాటలను వల్లె వేస్తూ కూనిరాగాలవుతుంది
సీహెచ్. ఉషారాణి, 9441228142
