ఎగిరే గాలిపటాలు లేక ఆకాశం చిన్నబోయింది
భోగిపళ్ళు పోసిన ఆనవాలు లేక ఇంటి గడపలన్నీ బోసిపోయినాయి
డూడు బసవన్నలు సన్నాయి మేళాలు లేక వీధులన్నీ వెలవెలపోతున్నాయి
పల్లెటూళ్లలో సైతం రంగునీళ్ల కళ్ళాపి ఫ్యాషన్ అయ్యింది
పిండివంటల ఘుమ ఘుమలన్నీ స్వగృహ ఫుడ్ సెంటర్లకి పరిమితమయ్యాయి
వంటింట్లో మూకుళ్ళు మూలన పడ్డాయి
పల్లెలన్నీ కూడా పట్నం బాట పట్టాయి
పండగలన్నీ ఈవెంట్లుగా మారిపోతున్నాయి
ఎవరో వచ్చి సరదాగా సంబరాలు చేయించి పోతున్నారు
ఇంట్లో బంధువుల రాకపోకలు లేవు
సరదాగా చెప్పుకునే ముచ్చట్లు లేవు
ఇంట్లో చేసే రకరకాల వంటల రుచులు లేవు
స్విగ్గీ లో కొత్త రుచులను ఆర్డర్ చేసుకు తింటున్నారు
మామిడాకుల బంతి పూల తోరణాలు మాయమయ్యి
ప్లాస్టిక్ తోరణాలతో గుమ్మాలు వెలవెలపోతున్నాయి
పండగల సంబరాలన్నీ బుల్లితెరపై అంబరాన్నంటుతుంటే
మనమేమో మరమనుషుల్లా టీవీల ముందు కూర్చుని
పండుగలను ఆస్వాదిస్తూ
వాట్సాపుల్లో ఫేస్బుక్కుల్లో బంధు మిత్రులకు శుభాకాంక్షలు తెలుపుకుంటూ
మన సంప్రదాయాలకు దూరం అవుతున్నాము
విదేశాల్లో ఉన్న మన తెలుగోళ్ళు మాత్రం
మన సంస్కృతి సాంప్రదాయాలను పాటిస్తూ
తెలుగుదనాన్ని బతికిస్తున్నారు
సంప్రదాయ దుస్తుల్లో మన తెలుగు వంటకాల రుచులను విదేశీ మిత్రులకు చూపిస్తూ
పండుగలను సంబరంగా చేసుకుంటున్నారు
ఇక్కడేమో ‘సమ్’ క్రాంతే…
సంపూర్ణ సంక్రాంతి ఎప్పుడో…
దేవలపల్లి సునంద, 8297744716
