నగరం చౌరస్తాలో
కనిపించే కటౌట్లు కూల్చుతూ
ప్లెక్సీలను చింపి పార్టీల పరువుతీసే
ప్రబుద్ధుల సాక్షిగా
దూషణ భూషణలతో
వావి వరస లేకుండా
పార్టీ పరంగా వ్యక్తిగతంగా
తిట్ల పురాణాల చిట్టాలు విప్పుతూ
కంపుకొట్టే మతోన్మాద
విషరాజకీయ నాయకుల సాక్షిగా
పార్టీకి పార్టీకి మధ్య కక్షలు
కార్పణ్యాలతో కత్తులు నూరుతూ
ప్రతి పక్షాల గొంతు నులుముతూ
అధికార దాహంతో విర్రవీగే
అధికార పార్టీల సాక్షిగా
డబ్బును ఎరవేసి ఓటును కొనాలనే
సిగ్గులేని రాజకీయ
దౌర్భాగ్యుల సాక్షిగా
ఫ్యామిలీకింతని ప్యాకేజీ ఎరవేసి
రిటర్న్ గిఫ్ట్ ఇమ్మంటూ
మాయాజాలంతో గాలం వేసి
ఓటరుకి మసిబూసి
మారేడు కాయజేసే
నాయక మహాశయుల సాక్షిగా
ఓ… ఓటర్
ఇప్పుడు నీకో అవకాశం వచ్చింది
సిగ్గులేని రాజకీయ నాయక
మూకల నూరుమాడేందుకు
తరిమి తరిమి కొట్టే
ఓ… అద్భుత అవకాశం నీకిచ్చింది
అసలైన సిసలైన మంచి
నాయకుడిని మంచి పార్టీని ఎన్నుకునే
సదవకాశం నీ కొచ్చింది
నీ ఓటు దుర్వినియోగం కాకుండా
సద్వినియోగం చేసుకో
మనిషిగా మసులుకో…
కొరుప్రోలు హరనాథ్
9703542598
