సంక్రాంతి సోయగాలు

మంచు  పూరెమ్మలతో నింగి

శ్వేత కమలమై వికసించిన వేళ

ఎరుపు పసుపు సమ్మిళిత

రంగుల వర్ణమై నులివెచ్చని

సూర్య కాంతులు

ముస్తాబైన ధరణిని తాకగా

పల్లె అందాల ప్రతిబింబమై పలకరించే

పచ్చని తోరణాలు

కళకళలాడుతూ

సంక్రాంతి లక్ష్మిని స్వాగతిస్తూ

మురిసిపోతున్న తెలుగింటి గుమ్మాలు

లోగిళ్ళలో

హరివిల్లులై విరిసిన

రంగవల్లులు

రంగుల హారమై

మెరువగా

పసిడి ఛాయతో ముద్దబంతులు పలకరించగా

పసుపు గంధంతో

స్నానమాడిన

గొబ్బెమ్మలు ముంగిళ్లలో

కొలువుతీరి

కనువిందు చేస్తూ

చలిని తరిమేసే భోగి మంటలు

భోగ భాగ్యాలను అందిస్తూ

వాకిలిలో పొంగే పొంగలి

మనసులను తీపి చేస్తూ

ఆశయాల ఉన్నతమై

గగన వీధులలో విహంగాలై

ఎగిరే పతంగుల సంకేతాలు

హరిదాసుల సంకీర్తనలు

వీనుల విందుగా

అమృత  ధారలై కురిపిస్తూ

బసవన్న ఆటలతో అలరిస్తూ

కోడిపందాలతో

కొత్త ధాన్యపు సిరులు

ఇల్లు నిండగా

వీధులన్నీ సకల కళలతో

కొలువుతీరి సందడి చేస్తూ

తరాల తార్కాణమై

కొలువు తీరిన

బొమ్మల కొలువులు

కనువిందు చేస్తూ

సంస్కృతి వారసత్వమై

చిన్నారుల్ని అభిషేకించే

భోగిపళ్ళు

ముత్తైదువుల ఆశీర్వాదాలు

నవధాన్యపు పూజలు

పితృదేవతల తర్పణాలతో

అంబరాన్ని తాకిన సంబరాలు

చిన్నారులు కేరింతలతో

చిందులు వేస్తూ

సంక్రాంతి సోయగాలు

ప్రతి ఇల్లు బృందావనమై

విరబూస్తూ

ఆత్మీయతలని రంగరించి

అనుబంధాల్ని పెనవేసుకునే

క్షణాన ఈ

ఆనంద హేల

ఆ స్వర్గమే భూతలం పైకి

దిగి వచ్చిన వేళ

ఎన్నెన్ని ఆనందాలో

ఎనెన్ని సరదాలో

ఎన్నెన్ని జ్ఞాపకాలో….

ప్రతి మదిని దోచుకునే సంక్రాంత్రి.

నెల్లుట్ల సునీత, 7989460657