తే.గీ:-1
గడిచి పోయిన వర్షాల కష్టములను
పార ద్రోలుచు సుఖ పరంపరలనిడుచు
నాయురారోగ్య భాగ్యమ్ము లందజేసి
శుభకృదబ్దమిడును గాక శుభము మనకు.
తే.గీ:-2
విద్య నేర్చు శిశువులకు విద్య నిచ్చి
యువత కంతకు బంగారు భవితనిచ్చి
సకల జీవ జాలమునకు సౌఖ్యమిచ్చి
శుభకృదబ్దమిడును గాక శుభము మనకు.
తే.గీ:-3
సరి సమయమందు వానలన్ కురియజేసి
నిండుకొననట్టి పంటలన్ పండజేసి
కరువు కాటకమ్ములనన్ని తరిమి వేసి
శుభకృదబ్దమిడును గాక శుభము మనకు.
తే.గీ:-4
దేశ దేశాల మధ్యన దివ్యమైన
స్నేహ సౌభ్రాతృభావముల్ నిండి సతము
శాంతి మార్గాన పయనించు కాంతి నింపి
శుభకృదబ్దమిడును గాక శుభము మనకు
నెల్లుట్ల సునీత, ఖమ్మం, 7989460657
