పాదాలు

కాశ్మీరం నుంచి

కన్యాకుమారి దాకా

పరుచుకున్నాయి పాదాలు

పాదాలలా తనమీదుగా

నడుస్తూ పోయినప్పుడల్లా

వాటి రుధిర రోదనలతో

దేశం ఒక అలావా అవుతుంది

శతాబ్దాల హృదయఘోషను

అలవికాని వేదనతో

నెర్రెలు వారిన దేహానికి చికిత్సకై

అలుపెరుగని తపన తనది

పాదాలను ఒడిలో దాచి

నిద్రకాచిన అనుభవాలెన్నో

పుట్టిన ప్రతి నొప్పీ

పాలకుల నిర్లక్ష్యపు నిండు చిహ్నమే

కూడంకులమ్ విద్యుత్ ప్రాజెక్టును వద్దన్న  దూదిపింజ పాదము

రుణమాఫీని వేడుకుంటూ గిలగిలలాడుతూ చీలిన  పాదము

సొంతూరికి నడిచెళ్తూ రక్తాన్ని స్రవించే పాదము

ఏ పాదము ఎటు కదిలినా

చీమ కుట్టని దేహాలకు పట్టదు

కోట్ల లెక్కల్లో మునిగి మభ్యపెట్టే మోసకారి మెదడుకు

కూటి కోసం కదలాడే పాదం గురించి పట్టనైనా పట్టదు

– నస్రీన్ ఖాన్, హైదరాబాద్