ఉషోదయాన
సన్నని తుంపరలో తడుస్తూ
పక్షుల కిలకిలలు వింటూ
పచ్చని చేల వెంబడి నడుస్తుంటే
నులివెచ్చని హాయి
తొలకరి జల్లుకు
భూమాత పులకించి
వెదజల్లిన మట్టివాసన
నాసికాపుటాలను తాకుతుంటే కమ్మని హాయి
కురిసిన వాన జల్లు
చిరు కాలువలై పారుతుంటే
కాగితం పడవలు వేసి
మురిసిన పసితనం
ఎంతో హాయి
సాయం సంధ్యలో
పిట్టగోడ మీద కూర్చుని
చిరుజల్లులు ఆస్వాదిస్తూ
వేడివేడి పకోడీలు తింటుంటే
పసందైన హాయి
అర్ధరాత్రి చిరుగాలి మోసుకొచ్చిన
చల్లని జల్లుకు ఒళ్ళు ఝల్లుమని
చెవుల మీదకు దుప్పటి లాగి ముడుచుకు పడుకుంటే
..చెప్పలేని ఆ హాయి
ఎంతో వెచ్చగ ఉంటుందోయి
భారత్ భాషా భూషణ్ డా. కేతవరపు రాజ్యశ్రీ, 8500121990