బతుకు నిచ్చిన అమ్మను
పూల రూపంలో పూజింపబడే గౌరమ్మను
ప్రకృతిలో ప్రతి అణువు నేనై
ప్రపంచానికి ప్రాణం పోసిన విశ్వ మాతను!
చెమట చుక్కలతో సహవాసం చేసే
తెలంగాణ తల్లుల ఆడ పడచును
వాగులు వంకలు నిండిన ఋతువులో
ఒడలంతా పూల సోయగంతో మురిసిన ముదితను!
తీరొక్క పూలతో కొలువు తీరిన బతుకమ్మను
సబ్బండ జాతుల మహిళలు
ఆలపించే సమైక్యతా రాగాన్ని!
కష్ట సుఖాలను కలబోసుకునే
కమనీయమైన పండుగను
ఎంగిలి పూలతో ఎద ఎదనూ పలకరించి
సద్దుల బతుకమ్మ సంబురాన్నై
సలిలంలో నిమజ్జనమయ్యే బతుకమ్మను!
ఆడపడుచుల అస్తిత్వాన్నై
అనాదిగా గౌరవింపబడుతున్న దేవతను!
వురిమళ్ల సునంద, ఖమ్మం, 9441815722
