జపాన్ పర్యటనలో ఉన్న ప్రధాని నరేంద్రమోడీ అక్కడి భారత మూలాలు ఉన్న ప్రజలను ఉద్దేశించి చేసిన ప్రసంగం ఉర్రూతలూగించింది. ఈ సందర్భంగా అక్కడి ప్రజలు మోదీ-మోదీ, జై శ్రీరామ్ నినాదాలు చేస్తూ ప్రధాని మోదీకి స్వాగతం పలికారు. సోమవారం టోక్యోలో ఎన్నారైలను ఉద్దేశించి ప్రధాని నరేంద్ర మోదీ చేసిన ప్రసంగం అక్కడి ప్రజల నుంచి పలు ప్రశంసలు అందుకున్నది.
‘‘నేను జపాన్‌కు వచ్చినప్పుడల్లా మీ ప్రేమ వర్షం ప్రతిసారీ పెరుగుతూనే ఉండటం చూస్తున్నాను. మీలో చాలా మంది స్నేహితులు చాలా సంవత్సరాలుగా ఇక్కడ నివసిస్తున్నారు. జపాన్ భాష, దుస్తులు, సంస్కృతి మరియు ఆహారం ఒక విధంగా మీ జీవితంలో భాగమయ్యాయి. పని చేసే భూమి తో శారీరకంగానే కాకుండా మనస్సుతో అనుబంధం పెంచుకోవడం మన ప్రత్యేకత’’ అని ప్రధాని మోడీ అన్నారు.
అయితే మాతృభూమి మూలాలతో మాత్రం అనుబంధం తెంచుకోవద్దని హితవు చెప్పారు. వివేకానంద తన చారిత్రాత్మక ప్రసంగం కోసం చికాగోకు వెళ్లే ముందు జపాన్‌కు వచ్చారని మోడీ గుర్తు చేశారు. ‘‘జపాన్ ఆయన మనసులో లోతైన ముద్ర వేసింది. జపాన్ ప్రజల దేశభక్తి, జపాన్ ప్రజల విశ్వాసం, పరిశుభ్రత పట్ల జపాన్ ప్రజల అవగాహనను ఆయన ముక్తకంఠంతో కొనియాడారు’’ అని మోడీ గుర్తు చేశారు.
బుద్ధ భగవానుడి మార్గమే శ్రేయస్కరం
జపాన్‌తో భారత్ సంబంధం బలం, గౌరవం, ప్రపంచానికి ఉమ్మడి సంకల్పం అని ఆయన తెలిపారు. జపాన్‌తో మన సంబంధం బుద్ధుడు, బౌద్ధమతం, జ్ఞానం, ధ్యానం అని అన్నారు. టోక్యోలో జరిగిన ఓ కార్యక్రమంలో భారతీయ సమాజాన్ని ఉద్దేశించి ప్రధాని మోదీ మాట్లాడుతూ, బుద్ధ భగవానుడు చూపిన మార్గాన్ని, ఆయన ఆలోచనలను అనుసరించడం నేటి ప్రపంచం చాలా అవసరమని అన్నారు.
హింస, అరాచకం, తీవ్రవాదం, వాతావరణ మార్పు వంటి ప్రతి సవాలు నుండి మానవాళిని రక్షించడానికి ఇది సహాయపడే మార్గమని ఆయన తెలిపారు. 21వ శతాబ్దంలో కూడా భారత్, జపాన్ దేశాల సాంస్కృతిక సంబంధాలను పూర్తి నిబద్ధతతో ముందుకు తీసుకెళ్తున్నామని చెప్పారు.
జపాన్ మాజీ ప్రధాని అబే కాశీకి వచ్చినప్పుడు కాశీకి అద్భుతమైన కానుక ఇచ్చారని కాశీ ఎంపీగా గర్వంగా చెప్పగలన అని ప్రధాని మోడీ అన్నారు. కాశీలో జపాన్ సహకారంతో చేసిన రుద్రాక్ష, ఒకప్పుడు తన కర్మభూమి అయిన అహ్మదాబాద్‌లోని జెన్ గార్డెన్ మరియు కైజాన్ అకాడమీ ప్రతిష్టాత్మకంగా మారాయని మోడీ అన్నారు. ప్రపంచంలో 100 ఏళ్ల లో రాని అతిపెద్ద సంక్షోభానికి కరోనా కారణమైందని ఆయన అన్నారు.
ఇది ప్రారంభమైనప్పుడు, తరువాత ఏమి జరుగుతుందో ఎవరికీ తెలియదు. దాని వ్యాక్సిన్ వస్తుందో లేదో కూడా ఎవరికీ తెలియదు, కానీ భారతదేశం కూడా అప్పట్లో ప్రపంచ దేశాలకు మందులను పంపింది. భారతదేశంలో కూడా కోవిడ్ సందర్భంగా అనిశ్చితి వాతావరణం నెలకొంది. ఆ సమయంలో కూడా భారతదేశం ప్రపంచ దేశాలకు మందులను పంపింది అని ఆయన గుర్తు చేశారు.
ప్రపంచానికి మేడిన్ ఇండియా వ్యాక్సిన్ ఇచ్చాం
వ్యాక్సిన్ అందుబాటులోకి వచ్చినప్పుడు, భారతదేశం తన కోట్లాది మంది పౌరులకు ‘మేడ్ ఇన్ ఇండియా’ వ్యాక్సిన్‌ను అందచేసిందని ప్రధాని మోడీ తెలిపారు. ప్రపంచంలోని 100 కంటే ఎక్కువ దేశాలకు వ్యాక్సిన్ ను భారత్ పంపిందని ఆయన అన్నారు.
ప్రపంచ ఆరోగ్య సంస్థ భారతదేశంలోని ఆశా సోదరీమణులను డైరెక్టర్ జనరల్స్ – గ్లోబల్ హెల్త్ లీడర్స్ అవార్డుతో సత్కరించిందన్నారు. భారతదేశంలోని లక్షలాది మంది ఆశా సోదరీమణులు, మాతృ సంరక్షణ నుండి టీకా వరకు, పోషకాహారం నుండి పరిశుభ్రత వరకు, దేశ ఆరోగ్య ప్రచారానికి ఊపునిస్తున్నారు.
‘‘నేడు వాతావరణ మార్పు ప్రపంచం ఎదుర్కొంటున్న ముఖ్యమైన సంక్షోభంగా మారిందని ఆయన అన్నారు. మేము భారతదేశంలో కూడా ఈ సవాలును చూశాము, ఆ సవాలుకు శాశ్వత పరిష్కారం కోసం మార్గాలను కనుగొనడానికి కూడా మేము ముందుకు వచ్చాము’’ అని మోడీ తెలిపారు. నేడు భారతదేశంలో నిజంగా ప్రజల నేతృత్వంలోని ప్రభుత్వం పని చేస్తోంది. ప్రజాస్వామ్యంపై ఎప్పటికీ బలపడుతున్న విశ్వాసానికి ఇదే అతిపెద్ద కారణం.
నేడు భారతదేశం స్వాతంత్య్ర వజ్రోత్సవాల పండుగను జరుపుకుంటుంటే రాబోయే 25 ఏళ్లకు అంటే స్వాతంత్య్రం వచ్చి 100 ఏళ్లు పూర్తికావడానికి భారతదేశాన్ని ఎంతో ఎత్తుకు తీసుకెళ్లాలని అన్నారు. నేడు దేశం ఆ రోడ్‌మ్యాప్‌ను సిద్ధం చేయడంలో నిమగ్నమై ఉందని మోడీ తెలిపారు. మీరు మీ నైపుణ్యాలతో, మీ ప్రతిభతో జపాన్ భూమిని గొప్పగా మార్చారని మోడీ తెలిపారు. జపాన్ క్రమశిక్షణను భారతీయులు అలవరచుకోవాలని ఆయన పిలుపునిచ్చారు.
