సన్యాసం స్వీకరించి మహర్షి
కాబోయి,అనూహ్యంగా రాజర్షి గా
మారిన ఓ ఆథ్యాత్మిక వేత్త
భాషలకే భాషను నేర్పిన
బహు భాషా కోవిదుడు
వాగ్దేవి ముద్దుబిడ్డడు
వారసత్వపు దొరతనాన్ని స్వచ్ఛందంగా
వదలుకొని, సామాన్యుని వలె
జీవనం సాగించిన
ఓ మానవతా మూర్తి
తెలుగంటే తెలియని వారికి,
యావత్ ప్రపంచానికి
‘తెలుగు ‘అర్థం చెప్పిన
జగద్విఖ్యాత ఈ తెలంగాణ
ముద్దుబిడ్డడు
అర్థశాస్త్రాన్ని చదవక పోయినా
సుడిగుండంలో చిక్కుకొని
అగమ్యగోచరంగా తయారైన
భారత ఆర్థిక రాజకీయ వ్యవస్థను
ఓ గాటికి తెచ్చిన అపర చాణక్యుడు
రాజకీయ చదరంగంలో
ఆటుపోట్లను తట్టుకుని
నిష్కళంకుడిగా ముద్ర
వేయించుకున్న ఓ కర్మయోగి
అవార్డు లన్నీ రాజకీయాలతో
ముడిపడి ఉన్న వ్యవస్థ లో
తెలంగాణ రత్నానికి
తెలుగు వజ్రానికి
ఈ మహా యోగికి
ప్రజల ప్రేమాభిమానాలే
ఓ పెద్ద అవార్డు
పీ.వి.యస్. కృష్ణ కుమారి, తుర్కయాంజాల
