కాలం ఒడిలో
నిత్యం ఉదయాలు దొర్లుతుంటాయి
చుట్టుకున్నచీకట్లను తొలుచుకుని
రాలిన కొన్ని కిరణాలు నేలంతా పరుచుకుంటాయి
అన్ని ఉదయాలూ ఒకేలా ఉండవు
ఒక వర్షం
ఒక వసంతమై
ఒక ఉదయాన్ని ఆహ్వానిస్తుంది
ఈ జగత్తుకు చైతన్యాన్ని ఇస్తుంది
అన్ని జీవితాలూ వసంతమై విరియవు
వసంతాన్ని ఆహ్వానించడం మన విధి
జీవితం షడ్రుచుల సంగమం
తీపి,వగరు,చేదు,పులుపుల మిశ్రమమే జీవితం
ఆస్వాధిస్తేనే తెలుస్తుంది రుచికీ రుచికీ మధ్య ఉన్న స్నేహం
తెలుగు గుమ్మాలకు పచ్చతోరణాలు
పసుపు పాదాలతో ఇంటి ఇల్లాలు
నూతన ఆశయాలతో గృహసీమ లో కళకళలు
ప్రతి ఉదయం వసంతం కాదు
వసంతంలా కొన్ని జీవితాలను
చిగురింపజేయడం నేర్చుకోవాలి
ఉషస్సు వెలుగులను మననీడనున్న
వారికి కూడా చేరనివ్వాలి
కష్టసుఖాలను సమపాళ్ళలో స్వీకరించి
నేటి ఉదయాన్ని కోకిల గానం తో ఆహ్వానించాలి
వాసరచెట్ల జయంతి, హైదరాబాద్, 9985525355